በችርነትሕ ዓመትን ታቀዳጃለሕ መዝ . 64፡ 11

ከመ/ር ዮሐንስ ለማ
የደብሩ ስብከተ ወንጌል ኃላፊ

adey abebaበተሳሳተ ምኞት የተበላሸውን አስቀድሞትኖሩበት የነበረውን አሮጌውን  ሰውነት  ከእናንተ አርቁ ። ልቡናችሁን በዕውቀት አድሱ ፤ በእውነት፤ በጽድቅና በንጽሕና እግዚአብሔርንለመምሰል የተፈጠረውን አዲሱን ስውነት ልበሱ ‘’ (ኤፌ . 4 . 22-24 ) ።

ስብሐት ለእግዚአብሔር ለዘአብጽሐነ እስከ ዛቲ ዕለት ። ከዚህ ዘመን ፤ ከዚህ ዕለትና ከዚሕ ሰዓት ያደረሰን ልዑል እግዚአብሔር ይክበርይመስገን ።   እንኳን ከ2ዐዐ4 ዓ.ምዘመነ ዮሐንስወደ 2ዐዐ5ዓ.ም ዘመነ ማቴዎስ  ( የዘመን መለወጫ )በዓል በሰላምና  በጤና  ሑላችንንምአደረሰን  አደረሳችሁ ፡፡ ፈጣሪያችን ቸሩ መድኅኔ ዓለም ዘመኑን የሰላም፤ የዕድገት ፤ የጤናና የበልጽግና ዘመን ያድርግልን ። ለሐገራችን ለቤተክርስቲያናችን እንዲሑም ለመላው ዓለም እውነተኛውን ሰላምና ፍቅር ያድለን ፤ ያውርድልን ።

 

“ዘይሔድሳ ለምድር በበረከቱ ፤ እግዚአብሔር  አምላክ ምድርን በበረከቱ ያድሳታል /ድጓ/ ‘’ ቅዱሳት መጻሕፍት እንደሚነግሩንና  እኛም እንደምንገነዘበው እግዚአብሔርአምላክ  በፍጡራን  አእምሮ ሊመጠን በማይችል በረከቱ ምድርንና በውስጧ ያሉትን ፍጥረታት ሁሉ በማያቋርጥ ሒደት እያደሰ ይኖራል ፡፡  ፍጥረታትም እየታደሱ እንዲተካኩ በማድረጉ የቀደመው ሲያልፍ አዲሱ ሲተካ የሕይወት ጉዞ የማያቋርጥ ሆኖ እንዲቀጥል አድርጎአል ፡፡ከጌታችን ከአምላካችን ከመድኀኒታችን ከኢየሱስ ክርስቶስ ልደትም በፊት የነበረው አሮጌ ዘመን ዓመተ ፍዳ፣ ዓመተ ኩነኔ በእርሱ መሥዋእትነት ሲያሳልፍ ከልደተ ክርስቶስ ጀምሮ ያለውንም የምሕረት ዘመን በማለት አድሶታል ፡፡

ወደፊትም በዳግም ምጽአቱ ሰማይንና ምድርን በማሳለፍ የተሻለ ሕይወት ለሰው ልጆች መስጠቱ የእግዚአብሔር ፈቃድ መሆኑን ከቅዱስ ወንጌል ተምረናል ፡፡ (ማቴ. 24-25) በመሆኑም ፍጥረታትን የማሳለፉ ተግባር የእግዚአብሔር ቀዋሚ ሥራ ሆኖ እናገኘዋለን ፡፡ እግዚአብሔር አምላካችን በባህርዩ ማርጀትና ኅልፈት የሌለበት ነው፤ በመጻኢው ዓለም ለሰው ልጆች ያዘጋጀው ሕይወትም ማርጀትና ኅልፈት የሌለበት፣ ሁል ጊዜ ሐዲስ ሆኖ የሚኖር ነው፡፡ የሃይማኖታችን ጽኑ ተስፋም በአዲሱ ዓለም ላይ የተመሠረተ ነው፡፡ ይሁንና ወደ አዲሱ ዓለም ለመድረስ  በየዘመኑ አዳዲስ ሥራዎችን በመሥራት እግዚአብሔርንና ፍጡራኑን በትጋት ማገልገል ያስፈለጋል፡፡ በዚህ ዓለም በፍጡራን ዓቅም ሊታደስ የማይችል ነገር ቢኖር ሃይማኖት ብቻ ነው፡፡ ከሃይማኖት በቀር ሌላው ሁሉ ለሰው ልጅ በሚጠቅም መንገድ ሊሻሻል፣ ሊስተካከልና ይበልጥ ሊጠቅም የሚችልበትን ዘዴ ተከትሎ ማሻሻል ተገቢ ይሆናል ፡፡ ዓለም ከተፈጠረ፣ ዘመን ከተቆጠረ አንሥቶ እስካሁን ባለበት ብቻ ቆሞ የኖረበት ዘመን የለም፤ በየጊዜው አዳዲስ የአሠራር ስልቶች እየተፈጠሩ፣ በቀጣይም በሌላ አዲስ ስልት እየተተኩ ይኖራሉ፤ ይህም ቀዋሚ የሆነ የእግዚአብሔር ጸጋ ነው ፡፡

 ከዚህ አኳያ በተሰናባቹ በ2ዐዐ4 ዓመተ ምሕረት ማብቂያና በአዲሱ 2ዐዐ5 ዓ.ም. መግቢያ ላይ ቆም ብለን ልናስበው የሚገባን ነገር አለ ፡፡  በተሰናባቹ  ዓመት የነበረንን አጠቃለይ ሥጋዊና መንፈሳዊ ተግባር መመርመር ሲሆን ያልሠራንባቸው አጋጣሚዎች ካሉም በአዲሱ ዘመን አካክሰን በመሥራት ያመለጠንን ሁሉ በእጥፍ ሠርቶ ለመተካት ጠንክሮ መሥራት ያስፈልጋል ፡፡ አዲሱ ዓመት ሲመጣ የደስታና የብልጽግና ዘመን እንዲሆንልን ከመመኘቱ ጋር በብሩህ ተስፋ መቀበላችን መልካም ነው፤ ይሁንና የደስታና የብልጽግና ምኞታችን ወደ ተጨባጭ ፍሬ ሊደርስ የሚችለው በሥራ ብቻ ነው ፡፡ በዓለማችን፣ እንዲሁም በአካባቢያችን የምናያቸው ውብና ድንቅ ነገሮች ሁሉ የሥራ ውጤት መሆናቸውን ለአንድ አፍታ እንኳ ቢሆን  ልንዘነጋው አይገባም ፡፡ እግዚአብሔር  እኛን የፈጠረ ለሥራ እንጂ ለሌላ አይደለም፤ በሥራ ላይ ቸልተኛነትን የምናሳይ ከሆነ ኑሮአችን መመሰቃቀል ብቻ ሳይሆን በእግዚአብሔር ፊት መክሊት ቀባሪ ተብሎ መጠየቅም እንዳለ ማሰብ ይገባናል ፡፡ እንደሚባለውም ‹‹ሰው ለመብላት አይኖርም፤ ለመኖር ይበላል እንጂ፤ እንዲሠራ፡፡ ለሥራ ክብርን አለመስጠት፣ እግዚአብሔር እኛን የፈጠረበትን ዓላማ እንደመዘንጋት የሚያስቆጥር ይሆናል፤ ይህ ደግሞ ለእኛ የሚበጅ አይደለም ፡፡ (ዘፍ. 1፡3) እግዚአብሔር ከበረከቱ ያጎደለብን አንዳችም ነገር የለም፤ በየጊዜው አዲስ የሆነ ራዕይ፣ አዲስ የሆነ አሠራር፣ አዲስ የሆነ ጥበብ፣ አዲስ የሆነ ዘመን፣ አዲስ የሆነ ጤንነት ወዘተርፈ ከመስጠት ያቋረጠበት ጊዜ የለም ፡፡ ይሁንና እርሱ የሰጠንን አዲስ የዘመን ስጦታ በአዲስ አስተሳሰብና አሠራር ተቀብለን ካልተጠቀምንበት አዲስ ዘመን ማለቱ ብቻ ከምኞትና ከቃላት ያለፈ ትርጉም ሊኖረው አይችልም፡፡ ዘመኑ አዲስ ሊሆን የሚችለው እኛ በምናበረክተው ሥራ እንጂ ዘመን በራሱ አዲስ ሊሆን አይችልምና እግዚአብሔርየሚወዳችሁና እግዚአብሔርን የምትወዱ ኢትዮጵያውያንና ኢትዮጵያውያት  ምዕመናንና ምዕመናት ወገኖቻችን በሙሉ አዳዲስ ሥራዎችንና አሠራሮችን በመፍጠር አዲሱን ዓመት በሁለመናው አዲስ አድርገን እናክብረው ፡፡ በዚህ በአዲሱ ዘመን በአዲሱ ዓመት ሁላችንም አዲስ ልብስ እንድንለብስና ሰውነታችንን አንጽተን አዲስ ስዎች ሆነን ሕይወታችንንም ለንስሐ አዘጋጅተን  እንድንኖር ልኡል እግዚአብሔር ይርዳን ።

 በድጋሜ እንኳን ለ2ዐዐ5ዓ.ም ዘመነ ማቴዎስ( የዘመን መለወጫ )በዓል በሰላም ሑላችንንምአደረሰንአደረሳችሁ ፡፡ ፈጣሪያችን ቸሩ መድኅኔ ዓለም ዘመኑን የሰላም የዕድገት የጤናና የበልጽግና ዘመን ያድርግልን ። ለሐገራችን ለቤተክርስቲያናችን እንዲሑም ለመላው ዓለም እውነተኛውን ሰላምና ፍቅር ያውርድልን ።

መልካም የሥራ ዘመን ያድርግልን  አሜን !!

መስከረም 2005 ዓ.ም